Dä witte Kroake in Hattörp

Vuor olen Tein was en Mann, dä hait Tees un konn wahrseggen. Wahrseggen bedütt in Plattdütschen "wicken", ind de Lüe seggten four öhne Wickentees. Hei hett ßiene Woarsagungen in ne Bauk uppeschriem. In wecken Hüsern in Hattörp harren dä Lüe freuer ßaun Bauk. In düssen Bauk stunnen twei Geschichten, wecke dä Lüe up Hattörp betogen hett.

In de iesten heit et, dat dat Dörp, wou en Feuer Meß taun Dörpe rut un wedder rin erfohrt würe, nitz von'n Kriege tau spüren kriegte. In de tweiten Gechichten hett dä ole Wickentees seggt, dat dat Dörp, wou de Lüe ne witten Kroacke fängen deen, oak nich von'n Kriege verrungenieret wern ßalle. Beije Geschichten hätt ßeck in Hattötp taudrocht, un deshalb chlöfften de Lüe, dat use Dörp, wenn et Krieg cheifte, hele blieben würe. Düsse Geschichten ßinn von dän olen Lüen ßau vertielt "In hinneren Krauge was ne neen Knecht, dä is matt ne Feuer Meß von'n Howe raffafohrn un taun Mulle Chrom taun Dörpe rut. Alle aober dat Stück Land nich finnen konne, weil ne ßien Häre nich recht beschaiet harre, is hei mett'n vulle Feure wieder na Hus fohren."

"Vuor hundert Joahren, as et in Hattörp noch keine Isenboahn chaaff, is doa, wuo hüte de Isenboahn foahrt, en chraten Angere mett hoagen Pöppeln ewest. Dä beijen Schoapers hotten doa ühre Schoaps. In einre Pöppeln was en Kroakennest All dä Schoapers einen Middag ünnern Bämen leigten, ßie de eine vuor den annren: "ßüh, doa in'n Neste ßitt watt Wittes!" Wilkenschoaper was nevätern un klantere an dän Boam rup. Doa sach hei en witten Kroaken in Neste. Hei schüchtere ne mett ßien Petzel hoach, un dä witte Vuogel fladdere raff anne Eren, wou ne Schermers Unkel, dä annre Schoaper, fung. An'n Obente namm ne Wilkenschoaper mett na Hus. Oaber ßiene Fru wolle nitz von den Vuogel wetten, un hei brochte ne na Discher Rudolph, dat was ßien Schwejerßohns. Dä freuje ßeck un chaff ßeck chroate Meuhe met dän Vuogel. An'n Doage ßatt dä witte Jakob in dän olen Birenboam, flaug ümmeher un harre ßiene Freeheit. An Obente luere Jakob uppen Birenboam, datt hei raffelanget wurd. Einen Obent harre de Discher verchetten, dän Vuogel rafftaulangen. Un alle dän annren Morgen ßiene Fraue upstund un Ho raffschmieten wolle, da lach dä Vuogel mett ne affebettenen Koppe an ne Eren. En Ilk oder ne Marte harre ne dotebetten."

Wat de ole Wickentees eschrewen hett in sien Bauk, dat is oak woahr eworen: In'n iesten Weltkrieg is in Hattörp nitz passiert, un in'n tweiten hät de Fliegers uppen Boahnhouwe blat en poar Zugmaschinen verrungenieret, un daie hett se in Reinholz Daniel ßienen Wostebodden twei Fettpötte kaputteschoten.

[ zurück ]